ਪੀ.ਏ.ਯੂ. ਤੋਂ ਸਿਖਲਾਈ ਹਾਸਲ ਕਰਨ ਵਾਲੇ ਖੇਤੀ ਉੱਦਮੀ ਨੂੰ ਫਸਲੀ ਰਹਿੰਦ-ਖੂੰਹਦ ਤੋਂ ਉਤਪਾਦ ਬਨਾਉਣ ਲਈ ਐਵਾਰਡ ਮਿਲਿਆ
ਲੁਧਿਆਣਾ 26 ਜੁਲਾਈ 2024 - ਪੀ.ਏ.ਯੂ. ਤੋਂ ਸਿਖਲਾਈ ਲੈ ਕੇ ਫਸਲੀ ਰਹਿੰਦ-ਖੂੰਹਦ ਤੋਂ ਉਤਪਾਦ ਬਨਾਉਣ ਵਾਲੀ ਕਰਾਸਟੇ ਕੰਪਨੀ ਨੂੰ ਬੀਤੇ ਦਿਨੀਂ ਇਸ ਖੇਤਰ ਦੇ ਵੱਕਾਰੀ ਐਵਾਰਡ ਨਾਲ ਸਨਮਾਨਿਆ ਗਿਆ| ਧਿਆਨ ਰਹੇ ਕਿ ਕਰਾਸਟੇ ਨੇ ਫਸਲੀ ਰਹਿੰਦ-ਖੂੰਹਦ ਦਾ ਮੁੱਲ ਵਾਧਾ ਕਰਕੇ ਫਰਨੀਚਰ ਅਤੇ ਪੈਕੇਜਿੰਗ ਉਤਪਾਦ ਤਿਆਰ ਕੀਤੇ ਹਨ| ਇਸ ਕੰਪਨੀ ਨੂੰ ਮਿਲੇ ਇਸ ਐਵਾਰਡ ਵਿਚ 15 ਲੱਖ ਰੁਪਏ ਦੀ ਰਾਸ਼ੀ ਸ਼ਾਮਿਲ ਹੈ| ਇਸ ਨਾਲ ਫਸਲੀ ਰਹਿੰਦ-ਖੂੰਹਦ ਦੀ ਵਰਤੋਂ ਅਤੇ ਵਾਤਾਵਰਨ ਪੱਖੀ ਸੰਭਾਲ ਲਈ ਯਤਨਸ਼ੀਲ ਅਦਾਰਿਆਂ ਦੇ ਕਾਰਜਾਂ ਨੂੰ ਮਾਨਤਾ ਮਿਲੀ ਹੈ| ਖੇਤੀ ਸਥਿਰਤਾ ਲਈ ਕਰਾਸਟੇ ਵੱਲੋਂ ਬਣਾਏ ਗਏ ਵਾਤਾਵਰਨ ਪੱਖੀ ਉਤਪਾਦ ਲੰਮੀ ਦੇਰ ਦਾ ਪ੍ਰਭਾਵ ਸਿਰਜਣ ਵਾਲੇ ਹਨ| ਇਸ ਨਾਲ ਫਰਨੀਚਰ ਲਈ ਨਵੀਂ ਸਮੱਗਰੀ ਅਤੇ ਪੈਕਿੰਗ ਇੰਡਸਟਰੀ ਲਈ ਨਵੀਂ ਤਰ੍ਹਾਂ ਦੇ ਉਤਪਾਦ ਬਨਾਉਣ ਦਾ ਰਾਹ ਪੱਧਰਾ ਹੋਇਆ ਹੈ|
ਵਾਈਸ ਚਾਂਸਲਰ ਡਾ. ਸਤਿਬੀਰ ਸਿੰਘ ਗੋਸਲ ਨੇ ਇਸ ਐਵਾਰਡ ਮਿਲਣ ਤੇ ਸੰਬੰਧਿਤ ਖੇਤੀ ਉੱਦਮ ਕੰਪਨੀ ਨੂੰ ਵਧਾਈ ਦਿੰਦਿਆਂ ਉਹਨਾਂ ਦੀ ਮਿਹਨਤ ਅਤੇ ਸਮਰਪਣ ਦੀ ਸ਼ਲਾਘਾ ਕੀਤੀ| ਇਸਦੇ ਨਾਲ ਡਾ. ਗੋਸਲ ਨੇ ਪੀ.ਏ.ਯੂ. ਦੇ ਸਿਖਲਾਈ ਢਾਂਚੇ ਨੂੰ ਨਵੇਂ ਖੇਤੀ ਯੁੱਗ ਦੀਆਂ ਲੋੜਾਂ ਅਨੁਸਾਰ ਢਾਲਣ ਲਈ ਪਾਬੀ ਅਤੇ ਪਸਾਰ ਕਰਮੀਆਂ ਨੂੰ ਸ਼ਾਬਾਸ਼ ਦਿੱਤੀ| ਉਹਨਾਂ ਕਿਹਾ ਕਿ ਇਸ ਐਵਾਰਡ ਨਾਲ ਫਸਲੀ ਰਹਿੰਦ-ਖੂੰਹਦ ਦੀ ਸੰਭਾਲ ਲਈ ਹੋਰ ਉੱਦਮੀ ਅਤੇ ਅਦਾਰੇ ਸਾਹਮਣੇ ਆਉਣਗੇ|
ਪਾਬੀ ਦੇ ਨਿਗਰਾਨ ਡਾ. ਤੇਜਿੰਦਰ ਸਿੰਘ ਰਿਆੜ ਨੇ ਕਿਹਾ ਕਿ ਕਰਾਸਟੇ ਵੱਲੋਂ ਇਸ ਖੇਤਰ ਵਿਚ ਕੀਤਾ ਗਿਆ ਕੰਮ ਬੜਾ ਨਿਵੇਕਲਾ ਅਤੇ ਹਾਂ ਵਾਚੀ ਹੈ| ਫਸਲੀ ਰਹਿੰਦ-ਖੂੰਹਦ ਤੋਂ ਤਿਆਰ ਹੋਣ ਵਾਲੇ ਉਤਪਾਦਾਂ ਦੀ ਮੰਗ ਵਧੇਗੀ ਅਤੇ ਹੋਰ ਲੋਕ ਇਸ ਖੇਤਰ ਨਾਲ ਜੁੜਨਗੇ| ਕਰਾਸਟੇ ਨੂੰ ਵਧਾਈ ਦੇਣ ਵਾਲਿਆਂ ਵਿਚ ਪਾਬੀ ਦੇ ਕਾਰੋਬਾਰੀ ਪ੍ਰਬੰਧਕ ਇੰਜ: ਕਰਨਬੀਰ ਗਿੱਲ ਵੀ ਸ਼ਾਮਿਲ ਸਨ|