ਕਾਰਗਿਲ ਦੀ ਜੰਗ ਦੇ ਯੋਧੇ ਸੇਵਾ ਮੁਕਤ ਕਰਨਲ ਵਰਿੰਦਰ ਕੁਮਾਰ ਦਾ ਸਨਮਾਨ
ਅਸ਼ੋਕ ਵਰਮਾ
ਬਠਿੰਡਾ ,26 ਜੁਲਾਈ 2024:ਕਾਰਗਿਲ ਵਿਜੈ ਦਿਵਸ ਦੀ 25ਵੀਂ ਸ਼ਤਾਬਦੀ ਮੌਕੇ ਕਾਰਗਿਲ ਜੰਗ ਨੂੰ ਆਪਣੀ ਲਾਜਵਾਬ ਬਹਾਦਰੀ ਨਾਲ ਜਿੱਤਣ ਵਾਲੇ ਬਹਾਦਰ ਜਵਾਨਾਂ ਨੂੰ ਸ਼ਰਧਾਂਜਲੀ ਭੇਟ ਕਰਦਿਆਂ ਭਾਜਪਾ ਆਗੂਆਂ ਨੇ ਸੇਵਾਮੁਕਤ ਕਰਨਲ ਵਰਿੰਦਰ ਕੁਮਾਰ ਨੂੰ ਸਿਰੋਪਾਓ ਪਾ ਕੇ ਸਨਮਾਨਿਤ ਕੀਤਾ। ਭਾਜਪਾ ਵਰਕਰਾਂ ਨੂੰ ਜੰਗ ਦੀ ਕਹਾਣੀ ਸੁਣਾਉਂਦੇ ਹੋਏ ਸੇਵਾਮੁਕਤ ਕਰਨਲ ਵਰਿੰਦਰ ਕੁਮਾਰ ਨੇ ਦੱਸਿਆ ਕਿ 3 ਮਈ ਨੂੰ ਜੰਗ ਸ਼ੁਰੂ ਹੋ ਗਈ ਸੀ। ਜੰਗ ਦੌਰਾਨ 45 ਦਿਨਾਂ ਤੱਕ ਉਹਨਾਂ ਦੀ ਉਸ ਦੇ ਪਰਿਵਾਰ ਨੂੰ ਕੋਈ ਖ਼ਬਰ ਨਹੀਂ ਸੀ। ਉਸ ਦੀ ਪਲਟਨ ਬਟਾਲਿਕ ਸੈਕਟਰ ਵਿੱਚ ਦੇਸ਼ ਦੇ ਦੁਸ਼ਮਣਾਂ ਨੂੰ ਰੋਕ ਰਹੀ ਸੀ ਜਿਸ ਲਈ ਲਗਾਤਾਰ ਹੋ ਰਹੀ ਗੋਲੀਬਾਰੀ ਦੌਰਾਨ ਚੱਟਾਨਾਂ ਨੂੰ ਕੱਟ ਕੇ ਬੰਕਰ ਬਣਾਏ ਗਏ ਸਨ।
ਵਰਿੰਦਰ ਕੁਮਾਰ ਨੇ ਦੱਸਿਆ ਕਿ ਸਾਡੇ ਮਨ ਵਿੱਚ ਇੱਕ ਸੰਕਲਪ ਸੀ, ਤੇਰਾ ਭੈਵਵ ਅਮਰ ਰਹੇ ਮਾਂ” ਅਤੇ ਮੋਰਚੇ ‘ਤੇ ਡਟ ਕੇ ਜਿੱਤ ਪ੍ਰਾਪਤ ਕੀਤੀ। ਭਾਜਪਾ ਯੁਵਾ ਆਗੂ ਸੰਦੀਪ ਅਗਰਵਾਲ ਨੇ ਕਿਹਾ ਕਿ ਦੇਸ਼ ਦੇ ਮਹਾਨ ਯੋਧਿਆਂ ਨੂੰ ਸਮਰਪਿਤ ਭਾਜਪਾ ਯੁਵਾ ਮੋਰਚਾ ਇਨ੍ਹਾਂ ਨੇਕ ਰੂਹਾਂ ਨੂੰ ਪ੍ਰਣਾਮ ਕਰਦਾ ਹੈ। ਅਤੇ ਯੋਧਿਆਂ ਨੂੰ ਸਮਰਪਿਤ ਦੇਸ਼ ਭਰ ਵਿੱਚ ਮਸ਼ਾਲ ਮਾਰਚ ਕੱਢਿਆ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਕਾਰਗਿਲ ਜੰਗ ਵਿੱਚ 524 ਸੈਨਿਕ ਅਤੇ ਅਧਿਕਾਰੀ ਸ਼ਹੀਦ ਹੋਏ ਸਨ ਜਦਕਿ 13 ਹਜ਼ਾਰ ਤੋਂ ਵੱਧ ਜਵਾਨ ਜ਼ਖ਼ਮੀ ਹੋਏ ਸਨ। ਸੰਦੀਪ ਅਗਰਵਾਲ ਨੇ ਕਿਹਾ ਕਿ ਦੇਸ਼ ਦੇ ਲੋਕ ਭਾਰਤੀ ਫੌਜ ਨੂੰ ਓਹਨਾ ਦੇ ਹੌਂਸਲੇ ਲਈ ਸਲਾਮ ਕਰਦੇ ਹਨ, ਜੋ ਕਿ ਜਾਨ ਦੀ ਪ੍ਰਵਾਹ ਕੀਤੇ ਬਿਨਾਂ ਔਕੜ ਭਰੇ ਹਾਲਾਤਾਂ ਵਿੱਚ ਵੀ ਦੇਸ਼ ਨੂੰ ਸੁਰੱਖਿਅਤ ਰੱਖਣ ਲਈ ਝੁਝਣ ਲਈ ਹਮੇਸ਼ਾ ਤਿਆਰ ਰਹਿੰਦੇ ਹਨ ।
ਭਾਜਪਾ ਦੇ ਜ਼ਿਲ੍ਹਾ ਜਨਰਲ ਸਕੱਤਰ ਅਸ਼ੋਕ ਬਾਲਿਆਂਵਾਲੀ ਨੇ ਕਿਹਾ ਕਿ ਅਜਿਹੇ ਮਹਾਨ ਯੋਧਿਆਂ ਕਾਰਨ ਭਾਰਤ ਮਾਤਾ ਤੇ ਕਦੇ ਵੀ ਕੋਈ ਆਂਚ ਨਹੀਂ ਆ ਸਕਦੀ ਹੈ।ਭਾਜਪਾ ਮਹਿਲਾ ਮੋਰਚਾ ਦੀ ਮੀਤ ਪ੍ਰਧਾਨ ਸੋਨੀਆ ਨਈਅਰ ਨੇ ਕਿਹਾ ਕਿ 1999 ਵਿੱਚ ਕਾਰਗਿਲ ਯੁੱਧ ਦੌਰਾਨ ਦੇਸ਼ ਦੀ ਫੌਜ ਨੇ ਵਿਰੋਧੀ ਹਾਲਾਤਾਂ ਵਿੱਚ ਦੁਸ਼ਮਣ ਵਿਰੁੱਧ ਜੋ ਲੜਾਈ ਲੜੀ ਸੀ, ਉਹ ਸਦਾ ਲਈ ਸੁਨਹਿਰੀ ਇਤਿਹਾਸ ਰਹੇਗੀ। ਇਸ ਮੌਕੇ ਕੁਨਾਲ ਨਈਅਰ, ਕਸ਼ਿਸ਼ ਮਹਿਤਾ, ਲਵਿਸ਼ ਆਦਿ ਹਾਜ਼ਰ ਸਨ।