ਆੜਤੀ 'ਤੇ ਨਕਾਬਪੋਸ਼ਾਂ ਨੇ ਚਲਾਈਆਂ ਗੋਲੀਆਂ
ਬਾਲ ਬਾਲ ਬਚਿਆ ਆੜਤੀ
ਰੋਹਿਤ ਗੁਪਤਾ
ਗੁਰਦਾਸਪੁਰ , 5 ਨਵੰਬਰ 2024- ਗੁਰਦਾਸਪੁਰ_ਡੇਰਾ ਬਾਬਾ ਨਾਨਕ ਰੋਡ ਤੇ ਸਥਿਤ ਦਾਣਾ ਮੰਡੀ ਗ਼ਜ਼ਨੀਪੁਰ ਫੋਕਲ ਪੁਆਇੰਟ ਤੇ ਗੋਰਾਇਆ ਕਮਿਸ਼ਨ ਏਜੰਟ ਨਾਮ ਤੇ ਆੜਤ ਦੀ ਫਰਮ ਚਲਾਉਣ ਵਾਲੇ ਆੜਤੀ ਹਰਮਿੰਦਰ ਸਿੰਘ ਤੇ ਦੋ ਅਨਪਛਾਤੇ ਮੋਟਰਸਾਈਕਲ ਸਵਾਰਾਂ ਵੱਲੋਂ ਗੋਲੀਆਂ ਚਲਾਉਣ ਦੀ ਖਬਰ ਸਾਹਮਣੇ ਆਈ ਹੈ। ਹਾਲਾਂਕਿ ਗੋਲੀਬਾਰੀ ਦੌਰਾਨ ਆੜਤੀ ਹਰਮਿੰਦਰ ਸਿੰਘ ਬਾਲ ਬਾਲ ਬਚ ਗਏ ਅਤੇ ਗੋਲੀ ਕਿਸੇ ਨੂੰ ਵੀ ਨਹੀਂ ਲੱਗੀ । ਜਾਣਕਾਰੀ ਅਨੁਸਾਰ ਆੜਤੀ ਮੰਡੀ ਵਿੱਚ ਸੀ ਜਦੋਂ ਇੱਕ ਮੋਟਰਸਾਈਕਲ ਤੇ ਦੋ ਨਕਾਬਪੋਸ਼ ਮੰਡੀ ਵਿੱਚ ਆਏ ਅਤੇ ਆਉਂਦੇ ਹੀ ਆੜਤੀ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ ਹਾਲਾਂਕਿ ਇਸ ਦੌਰਾਨ ਗੋਲੀ ਕਿਸੇ ਨੂੰ ਨਹੀਂ ਲੱਗੀ। ਗੋਲੀਆਂ ਚਲਾ ਕੇ ਮੋਟਰਸਾਈਕਲ ਸਵਾਰ ਤੁਰੰਤ ਕਲਾਨੌਰ_ ਡੇਰਾ ਬਾਬਾ ਨਾਨਕ ਵੱਲ ਨੂੰ ਫਰਾਰ ਹੋ ਗਏ।
ਉੱਥੇ ਹੀ ਮੌਕੇ ਤੇ ਪਹੁੰਚੀ ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਮੌਕੇ ਤੇ ਪਹੁੰਚੇ ਸਬੰਧਤ ਥਾਣਾ ਸਦਰ ਦੇ ਐਸ ਐਚ ਓ ਅਮਨਦੀਪ ਸਿੰਘ ਅਨੁਸਾਰ ਮੌਕੇ ਤੋਂ ਗੋਲੀਆਂ ਦੇ ਤਿੰਨ ਖੋਲ ਅਤੇ ਦੋ ਬਿਨਾਂ ਚਲੀਆਂ ਹੋਈਆਂ ਗੋਲੀਆਂ ਵੀ ਬਰਾਮਦ ਕੀਤੀਆਂ ਗਈਆਂ ਹਨ। ਮਾਮਲਾ ਦਰਜ ਕਰਕੇ ਪੜਤਾਲ ਸ਼ੁਰੂ ਕਰ ਦਿੱਤੀ ਗਈ ਹੈ ਅਤੇ ਜਲਦੀ ਹੀ ਵਾਰਦਾਤ ਦੇ ਕਾਰਨਾਂ ਤੋਂ ਪਰਦਾ ਚੁੱਕ ਲਿਆ ਜਾਵੇਗਾ।