ਚੋਰੀ ਦੇ ਟਰੈਕਟਰ ਸਮੇਤ ਤਿੰਨ ਕਾਬੂ, ਪਰਚਾ ਦਰਜ
ਦੀਪਕ ਜੈਨ
ਜਗਰਾਉਂ, 19 ਸਤੰਬਰ 2024 - ਪੁਲਿਸ ਜਿਲਾ ਲੁਧਿਆਣਾ ਦਿਹਾਤੀ ਦੇ ਐਸਐਸਪੀ ਨਵਨੀਤ ਸਿੰਘ ਬੈਂਸ ਆਈਪੀਐਸ ਵੱਲੋਂ ਚੋਰਾਂ ਅਤੇ ਭੈੜੇ ਅੰਸਰਾਂ ਨੂੰ ਕਾਬੂ ਕਰਨ ਲਈ ਚਲਾਈ ਗਈ ਮੁਹਿੰਮ ਅਧੀਨ ਅੱਜ ਸੀਆਈਏ ਸਟਾਫ ਜਗਰਾਉਂ ਵੱਲੋਂ ਤਿੰਨ ਬਦਮਾਸ਼ਾਂ ਨੂੰ ਕਾਬੂ ਕੀਤੇ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਮਾਮਲੇ ਬਾਰੇ ਜਾਣਕਾਰੀ ਦਿੰਦਿਆਂ ਹੋਇਆਂ ਸੀਆਈਏ ਸਟਾਫ ਜਗਰਾਉਂ ਦੇ ਏਐਸਆਈ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਉਹ ਆਪਣੇ ਸਾਥੀ ਕਰਮਚਾਰੀਆਂ ਦੇ ਨਾਲ ਗਸਤ ਅਤੇ ਚੈਕਿੰਗ ਭੈੜੇ ਪੁਰਸ਼ਾਂ ਦੇ ਸੰਬੰਧ ਵਿੱਚ ਸ਼ੇਰਪੁਰਾ ਰੋਡ ਐਲਆਈਸੀ ਚੌਂਕ ਜਗਰਾਓ ਮੌਜੂਦ ਸਨ ਤਾਂ ਉਹਨਾਂ ਨੂੰ ਮੁਖਬਰ ਖਾਸ ਨੇ ਇਤਲਾਹ ਦਿੱਤੀ ਕਿ ਲਿਆਕਤ ਅਲੀ ਪੁੱਤਰ ਹਾਜਮ ਖਾਨ ਵਾਸੀ ਪਿੰਡ ਅਗਵਾੜ ਲੋਪੋ ਖੁਰਦ ਜਗਰਾਉਂ ਜੋ ਕਿ ਦੂਸਰੇ ਜਿਲਿਆਂ ਤੋਂ ਟਰੈਕਟਰ ਟਰਾਲੀਆਂ ਅਤੇ ਹੋਰ ਲੋਹੇ ਦਾ ਸਮਾਨ ਚੋਰੀ ਕਰਕੇ ਲਿਆਉਂਦਾ ਹੈ ਅਤੇ ਇਹ ਚੋਰੀ ਦਾ ਸਮਾਨ ਵਿੱਕੀ ਕੁਮਾਰ ਉਰਫ ਵਿਕੀ ਕਬਾੜੀਆ ਪੁੱਤਰ ਦੇਵਰਾਜ ਵਾਸੀ ਰਕਬਾ ਰੋਡ ਨੇੜੇ ਸਕੂਲ ਵਾਲੀ ਗਲੀ ਮੁੱਲਾਪੁਰ ਨੂੰ ਵੇਚਦਾ ਹੈ ਅਤੇ ਵਿੱਕੀ ਕੁਮਾਰ ਕਬਾੜੀਆ ਇਹ ਸਮਾਨ ਅੱਗੋਂ ਆਪਣੇ ਰਿਸ਼ਤੇਦਾਰ ਫੌਜੀ ਸਿੰਘ ਪੁੱਤਰ ਜੈਮਲ ਰਾਮ ਵਾਸੀ ਪਿੰਡ ਕੰਮਾਂ ਜਿਲਾ ਲੁਧਿਆਣਾ ਰਾਹੀਂ ਚੋਰੀ ਦਾ ਸਮਾਨ ਖਰੀਦ ਕੇ ਅੱਗੇ ਵੇਚਦੇ ਹਨ।
ਏਐਸ ਆਈ ਬਲਵਿੰਦਰ ਸਿੰਘ ਨੇ ਅੱਗੇ ਦੱਸਿਆ ਕਿ ਵਿੱਕੀ ਕੁਮਾਰ ਵਿੱਕੀ ਕਬਾੜੀਏ ਦੀ ਪਹਿਲਾਂ ਕਬਾੜ ਜੀ ਦੁਕਾਨ ਸੀ ਅਤੇ ਲਗਭਗ ਦੋ ਤਿੰਨ ਮਹੀਨੇ ਪਹਿਲਾਂ ਇਸ ਨੇ ਬੈਟਰੀ ਵਾਲੀਆਂ ਸਕੂਟਰੀਆਂ ਵੀ ਏਜੰਸੀ ਸੁਧਾਰ ਵਿਖੇ ਖੋਲੀ ਹੋਈ ਹੈ ਅਤੇ ਇਹ ਲੋਕ ਨਿਆਕਤ ਅਲੀ ਤੋਂ ਇੱਕ ਚੋਰੀ ਦਾ ਟਰੈਕਟਰ ਮਾਰਕਾ ਫਾਰਮ ਟਰੈਕ 60 ਨੰਬਰ ਪੀਬੀ08 ਵਾਈ 2720 ਲਿਆ ਰਹੇ ਹਨ। ਜਿਨਾਂ ਨੂੰ ਸ਼ੂਗਰ ਮਿੱਲ ਜਗਰਾਉਂ ਦੇ ਨਜ਼ਦੀਕ ਨਾਕਾਬੰਦੀ ਕਰਕੇ ਘੇਰਿਆ ਗਿਆ ਅਤੇ ਵਿੱਕੀ ਕੁਮਾਰ ਉਰਫ ਵਿੱਕੀ ਕਵਾੜੀਆ ਅਤੇ ਫੌਜੀ ਸਿੰਘ ਤੋਂ ਇਲਾਵਾ ਲਿਆਕਤ ਅਲੀ ਆਦਿ ਦੋਸ਼ੀਆਂ ਨੂੰ ਉਕਤ ਟਰੈਕਟਰ ਸਮੇਤ ਕਾਬੂ ਕੀਤਾ ਗਿਆ। ਦੋਸ਼ੀਆਂ ਦੇ ਖਿਲਾਫ ਥਾਣਾ ਸਿਟੀ ਜਗਰਾਉਂ ਵਿਖੇ ਅਲੱਗ ਅਲੱਗ ਧਾਰਾਵਾਂ ਅਧੀਨ ਮੁਕਦਮਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।