ਕੈਨੇਡਾ: ਸਰੀ ਵਿਚ ਦੋ ਕਾਰਾਂ ਦੇ ਸਵਾਰਾਂ 'ਚ ਹੋਈ ਆਪਸੀ ਫਾਇਰਿੰਗ
ਹਰਦਮ ਮਾਨ
ਸਰੀ, 10 ਜਨਵਰੀ 2020-ਸਰੀ ਵਿਚ ਬੀਤੀ ਸ਼ਾਮ 96 ਐਵੀਨਿਊ ਤੇ ਗਰੀਨ ਟਿੰਬਰ ਦੇ ਨੇੜੇ ਦੋ ਕਾਰਾਂ ਵਿਚਕਾਰ ਕਰਾਸ ਫਾਇਰਿੰਗ ਹੋਣ ਦਾ ਪਤਾ ਲੱਗਿਆ ਹੈ। ਇਸ ਘਟਨਾ ਕਾਰਨ 96 ਐਵੀਨਿਊ ਅਤੇ 128 ਸਟਰੀਟ ਦੇ ਇੰਟਰ ਸੈਕਸ਼ਨ ਨੂੰ ਪੁਲਿਸ ਨੇ ਚਾਰੇ ਪਾਸਿਓਂ ਬੰਦ ਕਰ ਦਿੱਤਾ ਅਤੇ ਇੱਥੋਂ ਗੁਜ਼ਰਨ ਵਾਲੇ ਲੋਕਾਂ ਨੂੰ ਕਈ ਘੰਟੇ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ।
ਪੁਲਿਸ ਵੱਲੋਂ ਮਿਲੀ ਜਾਣਕਾਰੀ ਅਨੁਸਾਰ ਬੀਤੀ ਸ਼ਾਮ 5.30 ਵਜੇ ਪੁਲਿਸ ਨੂੰ ਸੂਚਨਾ ਮਿਲੀ ਕਿ 96 ਐਵੀਨਿਊ ਤੇ ਗਰੀਨ ਟਿੰਬਰ ਦੇ ਨਜ਼ਦੀਕ ਦੋ ਕਾਰਾਂ ਵਿਚ ਕਰਾਸ ਫਾਇਰਿੰਗ ਹੋਈ ਅਤੇ ਇਹ ਕਾਰਾਂ ਤੇਜ਼ ਸਪੀਡ ਨਾਲ ਲੰਘਦੀਆਂ ਲੋਕਾਂ ਨੇ ਦੇਖੀਆਂ। ਕਰੀਬ ਇਕ ਦਰਜਨ ਪੁਲਿਸ ਅਫਸਰ ਮੌਕੇ ਤੇ ਪਹੁੰਚੇ ਅਤੇ 96 ਐਵੀਨਿਊ ਨੂੰ ਚਾਰੇ ਪਾਸਿਓਂ ਸੀਲ ਕਰ ਦਿੱਤਾ। ਜਿਨ੍ਹਾਂ ਕਾਰਾਂ ਵਿਚਕਾਰ ਇਹ ਫਾਇਰਿੰਗ ਹੋਈ ਉਨ੍ਹਾਂ ਵਿੱਚੋਂ ਇਕ ਚਿੱਟੇ ਰੰਗ ਦੀ ਫੋਰਡ ਅਤੇ ਦੂਜੀ ਸਿਲਵਰ ਜਾਂ ਸਲੇਟੀ ਰੰਗ ਦੀ ਲੈਕਸਸ ਜਾਂ ਅਜਿਹੀ ਕੋਈ ਹੋਰ ਕਾਰ ਦੱਸੀ ਜਾਂਦੀ ਹੈ। ਫਿਲਹਾਲ ਇਸ ਘਟਨਾ ਵਿਚ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਕੋਈ ਸੂਚਨਾ ਨਹੀਂ।