ਮਨਪ੍ਰੀਤ ਸਿੰਘ ਜੱਸੀ
- ਨਿਤ ਵਰਤੋਂ ਦੀਆਂ ਲੋੜਾਂ, ਜ਼ਰੂਰੀ ਫੋਨ ਨੰਬਰ, ਕਰਫਿਊ ਪਾਸ ਤੇ ਹੋਰ ਸਹਾਇਤਾ ਲਈ ਕਲਿਕ ਕਰੋ
ਅੰਮ੍ਰਿਤਸਰ, 2 ਅਪ੍ਰੈਲ 2020 - ਕੋਵਿਡ 19 ਤੋਂ ਪੰਜਾਬ ਵਾਸੀਆਂ ਦਾ ਬਚਾਅ ਕਰਨ ਲਈ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਲਏ ਗਏ ਕਰਫਿਊ ਦੇ ਫੈਸਲੇ ਨਾਲ ਘਰਾਂ ਵਿਚ ਬੈਠੇ ਲੋਕਾਂ ਦੀਆਂ ਨਿੱਤ ਵਰਤੋਂ ਦੀਆਂ ਲੋੜਾਂ ਪੂਰੀਆਂ ਕਰਨ, ਕਰਫਿਊ ਪਾਸ ਬਨਾਉਣ, ਬਣਾਏ ਗਏ ਹੈਲਪ ਡੈਸਕ ਦੀ ਜਾਣਕਾਰੀ ਪ੍ਰਾਪਤ ਕਰਨ, ਕੋਰੋਨਾ ਸਬੰਧੀ ਜਾਗਰੂਕਤਾ, ਜਾਰੀ ਹਦਾਇਤਾਂ ਵੇਖਣ ਤੇ ਰੈਡ ਕਰਾਸ ਜ਼ਰੀਏ ਲੋੜਵੰਦਾਂ ਦੀ ਮਦਦ ਕਰਨ ਵਰਗੇ ਜਰੂਰੀ ਮੁੱਦਿਆਂ ਸਬੰਧੀ ਜਾਣਕਾਰੀ ਲੋਕਾਂ ਤੱਕ ਪੁੱਜਦੀ ਕਰਨ ਲਈ ਜਿਲ੍ਹਾ ਪ੍ਰਸ਼ਾਸਨ ਅੰਮ੍ਰਿਤਸਰ ਵੱਲੋਂ ਨਵੀਂ ਵੈਬਸਾਈਟ ਸ਼ੁਰੂ ਕੀਤੀ ਗਈ ਹੈ। www.asrcovidhelpline.in ਨਾਮ ਦੀ ਇਸ ਵੈਬਸਾਈਟ ਉਤੇ ਜਾ ਕੇ ਬਹੁਤੇ ਸ਼ੱਕ ਅਤੇ ਲੋੜਾਂ ਦੀ ਪੂਰਤੀ ਹੋ ਜਾਂਦੀ ਹੈ। ਡਿਪਟੀ ਕਮਿਸ਼ਨਰ ਸ਼ਿਵਦੁਲਾਰ ਸਿੰਘ ਢਿੱਲੋਂ ਦੀਆਂ ਹਦਾਇਤਾਂ ਉੱਤੇ ਵਧੀਕ ਡਿਪਟੀ ਕਮਿਸ਼ਨਰ ਹਿਮਾਸ਼ੂੰ ਅਗਰਵਾਲ ਦੀ ਅਗਵਾਈ ਹੇਠ ਤਿਆਰ ਕੀਤੀ ਇਸ ਵੈਬਸਾਈਟ ਨੂੰ ਜਿਲ੍ਹਾ ਵਾਸੀ ਕਰਫਿਊ ਦੇ ਦਿਨਾਂ ਦੌਰਾਨ ਆਪਣੀਆਂ ਲੋੜਾਂ ਪੂਰੀਆਂ ਕਰਨ ਲਈ ਕਲਿੱਕ ਕਰਨ। ਇਸ ਵਿਚ ਦਵਾਈਆਂ, ਸਬਜੀਆਂ, ਕਰਿਆਨਾ ਆਦਿ ਦੀ ਹੋਮ ਡਲਿਵਰੀ ਸਬੰਧੀ ਫੋਨ ਨੰਬਰ ਤੁਹਾਡੇ ਇਲਾਕੇ ਦੀ ਸਹੂਲਤ ਅਨੁਸਾਰ ਦਰਸਾਏ ਗਏ ਹਨ, ਜਿੰਨ੍ਹਾਂ ਉੱਤੇ ਰਾਬਤਾ ਕਰਕੇ ਤੁਸੀਂ ਹੋਮ ਡਲਿਵਰੀ ਲੈ ਸਕਦੇ ਹੋ। ਹਿਮਾਸ਼ੂੰ ਅਗਰਵਾਲ ਨੇ ਦੱਸਿਆ ਕਿ ਇਸ ਵੈਬਸਾਈਟ ਨੂੰ ਰੋਜ਼ਾਨਾ ਅਪਡੇਟ ਕਰਕੇ ਹੋਰ ਸੰਪਰਕ ਨੰਬਰ ਦਿੱਤੇ ਜਾ ਰਹੇ ਹਨ, ਤਾਂ ਜੋ ਲੋਕਾਂ ਦੀਆਂ ਲੋੜਾਂ ਦੀ ਪੂਰਤੀ ਅਸਾਨੀ ਨਾਲ ਹੁੰਦੀ ਰਹੇ।