ਵੋਟ ਕਿਸੇ ਨੂੰ ਵੀ ਪਾਓ, ਪਰ ‘ਆਪ’ ਨੂੰ ਸਬਕ ਸਿਖਾਓ, ਤਾਂ 4 ਸਾਲ ਵਧੀਆ ਲੰਘਣਗੇ : ਬਲਕੌਰ ਸਿੰਘ ਸਿੱਧੂ
ਬਲਵਿੰਦਰ ਸਿੰਘ ਧਾਲੀਵਾਲ
ਸੁਲਤਾਨਪੁਰ ਲੋਧੀ, 5 ਮਈ 2023 - ਲੋਕ ਸਭਾ ਹਲਕਾ ਜਲੰਧਰ ਦੀ ਹੋ ਰਹੀ ਜਿਮਨੀ ਚੋਣ ਦੌਰਾਨ ਸਵ: ਪੰਜਾਬੀ ਗਾਇਕ ਸ਼ੁਬਦੀਪ ਸਿੰਘ ‘ਸਿੱਧੂ ਮੂਸੇਵਾਲਾ’ ਦੇ ਪਿਤਾ ਬਲਕੌਰ ਸਿੰਘ ਸਿੱਧੂ ਅਤੇ ਉਨ੍ਹਾਂ ਦੀ ਮਾਤਾ ਚਰਨ ਕੌਰ ਨੇ ਲੋਹੀਆਂ ਖਾਸ ਦੇ ਸ਼ਹੀਦ ਭਗਤ ਸਿੰਘ ਚੌਂਕ ਵਿਚ ਵੱਡੀ ਗਿਣਤੀ ਵਿਚ ਇਕੱਠੇ ਹੋਏ ਨੌਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਹਾਕਮ ਧਿਰ ਵੱਲੋਂ ਸਕਿਓਰਟੀ ਲਿਸਟ ਲੀਕ ਕਰਨ ਦੀ ਅਣਗਹਿਲੀ ਕਾਰਨ ਉਨ੍ਹਾਂ ਨੂੰ ਆਪਣਾ ਪੁੱਤ ਗੁਆਉਣਾ ਪਿਆ ਹੈ।
ਉਨ੍ਹਾਂ ਕਿਹਾ ਕਿ ਜ਼ਿਮਨੀ ਚੋਣ ਵਿਚ ਵੋਟ ਕਿਸੇ ਪਾਰਟੀ ਨੂੰ ਵੀ ਪਾਓ, ਪਰ ‘ਆਪ’ ਨੂੰ ਸਬਕ ਸਿਖਾਓ, ਤਾਂ ਕਿ ਇਹ ਆਉਣ ਵਾਲੇ 4 ਸਾਲ ਸਾਫ਼ ਨੀਅਤ ਨਾਲ ਕੰਮ ਕਰਨ ਅਤੇ ਆਪਣੇ 4 ਸਾਲ ਵਧੀਆ ਲੰਘਣ। ਉਨ੍ਹਾਂ ਭਾਵੁਕ ਅਪੀਲ ਕਰਦਿਆਂ ਕਿਹਾ ਕਿ ਮੇਰੇ ਪੁੱਤਰ ਦੀ ਬਰਸੀ ਦਾ ਲਾਈਵ ਬੰਦ ਕੀਤਾ ਗਿਆ ਹੈ ਜਦਕਿ ਜੇਲ੍ਹਾਂ ਵਿਚ ਬੰਦ ਗੈਂਗਸਟਰਾਂ ਦੀਆਂ ਇੰਟਰਵਿਊ ਹੋ ਰਹੀਆਂ ਹਨ। ਉਨ੍ਹਾਂ ਨੇ ਪੰਜਾਬ ਦੇ ਕਈ ਮੰਤਰੀ ’ਤੇ ਦੋਸ਼ ਲਾਏ ਕਿ ਉਹ ਤਾਂ ਉਨ੍ਹਾਂ ਦੇ ਪੁੱਤਰ ਦੀ ਮੌਤ ’ਤੇ ਪ੍ਰੈੱਸ ਕਾਨਫਰੰਸਾਂ ਕਰਕੇ ਹਾਸੋਹੀਣੀਆਂ ਗੱਲਾਂ ਕਰਦੇ ਰਹੇ, ਜਿਨ੍ਹਾਂ ਨੂੰ ਸ਼ਾਇਦ ਪੁੱਤਰ ਦੀ ਅਰਥੀ ਨੂੰ ਮੋਢੇ ’ਤੇ ਢੋਹਣ ਦਾ ਦੁੱਖ ਨਹੀਂ ਪਤਾ।
ਇਸ ਮੌਕੇ ਗੁਰਦੁਆਰਾ ਸਿੰਘ ਸਭਾ ਲੋਹੀਆਂ ਦੀ ਕਮੇਟੀ ਤਰਫ਼ੋਂ ਡਾ. ਸਤਨਾਮ ਸਿੰਘ ਨੇ ਬਲਕੌਰ ਸਿੰਘ ਸਿੱਧੂ ਨੂੰ ਸਿਰੋਪਾਓ ਭੇਂਟ ਕੀਤਾ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਨੌਜਵਾਨ ਹਾਜ਼ਰ ਸਨ, ਜੋ ‘ਆਪ ਸਰਕਾਰ’ ਮੁਰਦਾਬਾਦ ਅਤੇ ‘ਸਿੱਧੂ ਮੂਸੇਵਾਲਾ’ ਅਮਰ ਰਹੇ ਦੇ ਨਾਹਰੇ ਲਗਾ ਰਹੇ ਸਨ।