ਲੁਧਿਆਣਾ, 17 ਮਈ 2019: ਅੱਜ ਦੁਪਹਿਰ ਹੋਈ ਭਾਰੀ ਵਰਖਾ ਵੀ ਕਾਂਗਰਸ ਉਮੀਦਵਾਰ ਰਵਨੀਤ ਸਿੰਘ ਬਿੱਟੂ ਦੁਆਰਾ ਅੱਜ ਲੁਧਿਆਣਾ ਸ਼ਹਿਰ ਵਿੱਚ ਕੀਤੇ ਗਏ ਵਿਸ਼ਾਲ ਰੋਡ-ਸ਼ੋਅ ਵਿੱਚ ਸ਼ਾਮਿਲ ਵੱਡੀ ਗਿਣਤੀ ਵਿੱਚ ਉਨ੍ਹਾਂ ਦੇ ਸਮਰਥਕਾਂ ਦਾ ਜੋਸ਼ ਘੱਟ ਨਹੀਂ ਕਰ ਪਾਈ ਅਤੇ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ਵਿੱਚੋਂ ਲੰਘਦੇ ਹੋਏ ਹੱਥਾਂ ਵਿੱਚ ਸ. ਬਿੱਟ ਦੇ ਕੱਟ ਆਊਟ ਅਤੇ ਝੰਡੇ ਫੜੀ ਜੋਸ਼ੀਲੇ ਕਾਂਗਰਸੀ ਵਰਕਰਾਂ ਵੱਲੋਂ ਬਿੱਟੂ ਦੇ ਹੱਕ ਵਿੱਚ ਕੀਤੀ ਗਈ ਨਾਅਰੇਬਾਜ਼ੀ ਨੇ ਅਕਾਸ਼ ਗੁੰਜਾ ਲਾ ਦਿੱਤਾ ਅਤੇ ਉਨ੍ਹਾਂ ਦੀ ਜਿੱਤ ਉੱਤੇ ਮੋਹਰ ਲਗਾ ਦਿੱਤੀ ।
ਸ. ਬਿੱਟੂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਉੱਨ੍ਹਾਂ ਨੂੰ ਵੱਡੀ ਗਿਣਤੀ ਵਿੱਚ ਵੋਟਾਂ ਦੇ ਕੇ ਜੇਤੂ ਬਣਾਉਣ ਤਾਂ ਕਿ ਲੁਧਿਆਣਾ ਲਈ ਸ਼ੁਰੂ ਕੀਤੇ ਗਏ ਵਿਕਾਸ ਕੰਮਾਂ ਨੂੰ ਜਾਰੀ ਰੱਖਿਆ ਜਾ ਸਕੇ। ਇਸ ਰੋਡ-ਸ਼ੋਅ ਵਿੱਚ ਵੱਖ-ਵੱਖ ਅਸੈਂਬਲੀ ਹਲਕਿਆਂ ਦੇ ਵਿਧਾਇਕਾਂ ਅਤੇ ਵਾਰਡਾਂ ਦੇ ਕੌਂਸਲਰਾਂ ਵੀ ਸ. ਬਿੱਟੂ ਦੇ ਨਾਲ ਸਨ । ਰੋਡ-ਸ਼ੋਅ ਲੁਧਿਆਣਾ ਉੱਤਰੀ ਹਲਕੇ ਵਿੱਚ ਕੈਲਾਸ਼ ਸਿਨੇਮਾ ਚੌਂਕ ਤੋਂ ਸ਼ੁਰੂ ਹੋਇਆ ਜਿੱਥੇ ਵਿਧਾਇਕ ਰਾਕੇਸ਼ ਪਾਂਡੇ ਅਤੇ ਉਨ੍ਹਾਂ ਦੇ ਪੁੱਤ ਦੁਸ਼ਯੰਤ ਪਾਂਡੇ ਵੀ ਵੱਡੀ ਗਿਣਤੀ ਵਿੱਚ ਸਮਰਥਕਾਂ ਸਮੇਤ ਸ. ਬਿੱਟੂ ਦੇ ਨਾਲ ਸਨ । ਰੋਡ-ਸ਼ੋਅ ਪ੍ਰੀਤਮ ਢਾਬਾ ਚੌਂਕ, ਦੋਮੋਰਿਆ ਪੁੱਲ, ਕਪੂਰ ਚੌਂਕ, ਜੀ ਟੀ ਰੋਡ ਪੀਰੂ ਬੰਦਾ ਚੌਂਕ, ਸਲੇਮ ਟਾਬਰੀ, ਜਲੰਧਰ-ਬਾਈਪਾਸ, ਭੌਰਾ, ਅਮਨ ਨਗਰ, ਭਾਰਤੀ ਕਲੋਨੀ ਤੋਂ ਲੰਘਿਆ।
ਲੁਧਿਆਣਾ ਪੂਰਬੀ ਹਲਕੇ ਵਿੱਚ ਵਿਧਾਇਕ ਸੰਜੈ ਤਲਵਾੜ ਅਤੇ ਹੋਰ ਕਾਂਗਰਸੀ ਨੇਤਾਵਾਂ ਵੱਲੋਂ ਸ. ਬਿੱਟੂ ਦਾ ਸਵਾਗਤ ਕੀਤਾ ਗਿਆ। ਰੋਡ-ਸ਼ੋਅ ਬਹਾਦੁਰਕੇ, ਹੰਬੜਾਂ ਰੋਡ, ਆਜ਼ਾਦ ਨਗਰ, ਕਾਲੀ ਸੜਕ, ਨੂਰ ਵਾਲਾ ਰੋਡ, ਸ਼ਿਵਪੁਰੀ, ਕੈਲਾਸ਼ ਨਗਰ, ਬਸਤੀ ਜੋਧੇਵਾਲ, ਰਾਹੋਂ ਰੋਡ, ਟਿੱਬਾ ਰੋਡ ਵੱਲੋਂ ਹੁੰਦੇ ਹੋਏ ਸਮਰਾਲਾ ਚੌਂਕ ਪਹੁੰਚਿਆ। ਇਸ ਮਗਰੋਂ ਰੋਡ-ਸ਼ੋਅ ਦਾ ਟਰਾਂਸਪੋਰਟ ਨਗਰ ਵਿੱਚ ਪੁੱਜਣ 'ਤੇ ਹਲਕਾ ਕੇਂਦਰੀ ਦੇ ਵਿਧਾਇਕ ਸੁਰਿੰਦਰ ਡਾਵਰ ਨੇ ਆਪਣੇ ਸਮਰਥਕਾਂ ਸਮੇਤ ਸ. ਬਿੱਟੂ ਦਾ ਸਵਾਗਤ ਕੀਤਾ ਅਤੇ ਰੋਡ ਸ਼ੋਅ ਵਿੱਚ ਸ਼ਾਮਿਲ ਹੋਏ। ਇੱਥੋਂ ਰੋਡ-ਸ਼ੋਅ ਆਤਮ ਨਗਰ ਹਲਕੇ ਵਿੱਚ ਪੁੱਜਿਆ ਅਤੇ ਮਾਡਲ ਟਾਊਨ, ਦੁੱਗਰੀ ਨਹਿਰ, ਸੀਆਰਪੀ ਕਲੋਨੀ, ਅਰਬਨ ਅਸਟੇਟ ਵੱਲੋਂ ਹੁੰਦੇ ਹੋਏ ਅਰਬਨ ਵਿਹਾਰ ਅਤੇ ਉੱਥੋਂ ਵਾਪਸ ਅਰੋੜਾ ਸਿਨੇਮਾ ਰੋਡ, ਜਨਤਾ ਨਗਰ ਤੋਂ ਹੁੰਦੇ ਹੋਏ ਗਿੱਲ ਚੌਂਕ ਪੁੱਜਾ।
ਰੋਡ-ਸ਼ੋਅ ਵਿੱਚ ਵਿਧਾਇਕ ਕੁਲਦੀਪ ਸਿੰਘ ਵੈਦ ਜ਼ਿਲ੍ਹਾ ਕਾਂਗਰਸ ਪ੍ਰਧਾਨ ਅਸ਼ਵਨੀ ਸ਼ਰਮਾ, ਕਮਲਜੀਤ ਸਿੰਘ ਕੜਵਲ, ਦਲਜੀਤ ਸਿੰਘ ਗਰੇਵਾਲ ਭੋਲਾ, ਵਿਪਨ ਵਿਨਾਇਕ, ਹਰਜਿੰਦਰਪਾਲ ਲਾਲੀ, ਡਾ. ਨਰੇਸ਼ ਉੱਪਲ, ਵਿਜੈ ਕਲਸੀ, ਕੁਲਦੀਪ ਜੰਡਾ, ਉਮੇਸ਼ ਸ਼ਰਮਾ, ਜਗਦੀਸ਼ ਦੀਸ਼ਾ, ਰਾਕੇਸ਼ ਪਰਾਸ਼ਰ, ਗੁਰਦੀਪ ਸਿੰਘ ਨੀਟੂ, ਰਾਜੂ ਥਾਪਰ, ਦੀਪਕ ਹੰਸ, ਨਵਨੀਤ ਘਾਇਲ, ਜਸਵੀਰ ਸਿੰਘ ਚੱਢਾ, ਰਵਿੰਦਰ ਕੌਰ ਚੱਢਾ ਵੱਡੀ ਗਿਣਤੀ ਵਿੱਚ ਆਪਣੇ ਸਮਰਥਕਾਂ ਦੇ ਨਾਲ ਸ਼ਾਮਿਲ ਹੋਏ ।