ਅਸ਼ੋਕ ਵਰਮਾ
ਬਠਿੰਡਾ,26ਮਾਰਚ2021:ਸਰਕਾਰੀ ਪਾਲੀਟੈਕਨਿਕ ਕਾਲਜ, ਬਠਿੰਡਾ ਦੇ ਲਾਇਬ੍ਰੇਰੀਅਨ ਸੁਖਵਿੰਦਰ ਸਿੰਘ ਨੇ ਆਪਣੀ ਪੋਤਰੀ ਨਿਮਰਤ ਕੌਰ ਦੇ ਜਨਮ ਦਿਨ ਮੌਕੇ ਕਾਲਜ ਦੀ ਲਾਇਬ੍ਰੇਰੀ ਲਈ ਪੱਖੇ ਅਤੇ ਐਲ.ਈ.ਡੀ. ਟਿਊਬ ਲਾਈਟਾਂ ਭੇਂਟ ਕਰਕੇ ਇੱਕ ਨਵੀਂ ਪਿਰਤ ਪਾਈ ਹੈ।ਕਾਲਜ ਦੇ ਪਿ੍ਰੰਸੀਪਲ ਯਾਦਵਿੰਦਰ ਸਿੰਘ ਨੇ ਲਾਇਬ੍ਰੇਰੀਅਨ ਸੁਖਵਿੰਦਰ ਸਿੰਘ ਦਾ ਧੰਨਵਾਦ ਕੀਤਾ ਅਤੇ ਪੋਤਰੀ ਦੇ ਜਨਮ ਦਿਨ ਦੀ ਵਧਾਈ ਦਿੰਦਿਆਂ ਸਟਾਫ ਮੈਬਰਾਂ ਨੂੰ ਅਪੀਲ ਕੀਤੀ ਕਿ ਉਹ ਵੀ ਵਿਦਿਆਰਥੀਆਂ ਦੀ ਭਲਾਈ ਹਿੱਤ ਆਪਣੀਆਂ ਘਰੇਲੂ ਖੁਸ਼ੀਆਂ ਮੌਕੇ ਕਾਲਜ ਦੀ ਸਹਾਇਤਾ ਲਈ ਅੱਗੇ ਆਉਣ। ਉਹਨਾਂ ਇਹ ਵੀ ਦੱਸਿਆ ਕਿ ਕਾਲਜ ਦੇ ਸਟਾਫ ਮੈਂਬਰ ਆਪਣਾ ਜਨਮ ਦਿਨ ਕਾਲਜ ਵਿੱਚ ਪੌਦੇ ਲਗਾ ਕੇ ਮਨਾਉਂਦੇ ਹਨ ਅਤੇ ਕਾਲਜ ਦੇ ਸਟਾਫ ਮੈਬਰ ਕਾਲਜ ਦੀ ਲਾਇਬ੍ਰੇਰੀ ਲਈ ਕਿਤਾਬਾਂ ਵੀ ਦਾਨ ਕਰਦੇ ਰਹਿੰਦੇ ਹਨ।
ਉਹਨਾਂ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਕਾਲਜ ਦੇ ਸਟਾਫ ਮੈਬਰਾਂ ਅਤੇ ਪੁਰਾਣੇ ਵਿਦਿਆਰਥੀਆਂ ਵੱਲੋਂ ਕਾਲਜ ਲਈ ਪੱਖੇ, ਐਗਜਾਸਟ ਫੈਨ, ਆਰ.ਓ, ਪਿ੍ਰੰਟਰ ਆਦਿ ਭੇਂਟ ਕੀਤੇ ਗਏ ਹਨ। ਆਰਕੀਟੈਕਚਰ ਵਿਭਾਗ ਦੇ ਪੁਰਾਣੇ ਵਿਦਿਆਰਥੀਆਂ ਵੱਲੋਂ ਵਿਭਾਗ ਵਿੱਚ ਰੈਨੋਵੇਸ਼ਨ ਅਤੇ ਰੰਗ-ਰੋਗਨ ਕਰਵਾਇਆ ਗਿਆ ਹੈ ਅਤੇ ਬੈਂਕ ਨੇ ਵੀ ਕਾਲਜ ਲਈ ਕੁਰਸੀਆਂ ਅਤੇ ਅਲਮਾਰੀਆਂ ਦਿੱਤੀਆਂ ਹਨ। ਉਹਨਾਂ ਕਿਹਾ ਕਿ ਇਹ ਇੱਕ ਚੰਗੀ ਰਵਾਇਤ ਹੈ ਅਤੇ ਉਹ ਹਮੇਸ਼ਾਂ ਇਸ ਲਈ ਸਟਾਫ ਅਤੇ ਵਿਦਿਆਰਥੀਆਂ ਨੂੰ ਪ੍ਰੇਰਿਤ ਕਰਦੇ ਰਹਿੰਦੇ ਹਨ। ਇਸ ਮੌਕੇ ਸਕੱਤਰ ਐਸ.ਆਰ.ਸੀ ਅਨੂਜਾ ਗੋਪਾਲ, ਲਾਇਬ੍ਰੇਰੀ ਅਫਸਰ ਮਨਜੀਤ ਸਿੰਘ ਭੁੱਲਰ ਅਤੇ ਦਫਤਰ ਇੰਚਾਰਜ ਚਰਨਜੀਤ ਸਿੰਘ ਵੀ ਹਾਜ਼ਰ ਸਨ।